Fredrik Reinfeldt, forsætisráðherra Svíþjóðar. Reuters

Fredrik Reinfeldt, forsætisráðherra Svíþjóðar, vill að landar hans séu á vinnumarkaði þar til þeir ná 75 ára aldri. Hann hvetur atvinnurekendur til þess að vera opnir fyrir því að ráða fólk sem er eldra en 55 ára.

Reinfeldt sagði í viðtali við sænska dagblaðið Dagens Nyheter að velferðarkerfi landsins og lífeyriskerfi gæti vart borið sig miklu lengur án þess að fólk væri reiðubúið að vinna lengur.

Hann sagði að viðhorf þyrftu að breytast, ekki síst hjá atvinnurekendum sem þyrftu að breyta viðhorfum sínum gagnvart fólki eldra en 50 ára.

„Að ráða einhvern sem er 55 ára og segir: Já, ég ætla að vinna þar til ég er 75 ára. Það eru 20 ár,“ segir Reinfeldt.

Eftirlaunakerfið í Svíþjóð er sveigjanlegt á þann hátt að fólk getur byrjað að taka út lífeyri sinn 61 árs eða haldið áfram að vinna þar til það er orðið 67 ára. 7,8% Svía eldri en 65 ára voru í vinnu árið 2010.

„Ef fólk heldur að við getum lifað lengur og stytt vinnuævi okkar, þá mun lífeyrir lækka. Spurningin er: erum við tilbúin til þess?“ sagði forsætisráðherrann. Hann sagði að fólk ætti að búa sig undir að skipta um starf þegar vinnan verður of líkamlega erfið eða fer að valda streitu. 

„Vinstrimenn trúa því að þegar vinnan þín verður erfið, þá eigir þú að fara snemma á eftirlaun eða fá einhvers konar bætur frá hinu opuinbera. En ég tel að þegar starfið verður of erfitt ætti fólk að finna sér eitthvað annað að gera.“

Ummæli Reinfeldts hafa fengið allnokkur viðbrögð, meðal annars frá samtökum verkalýðsfélaga sem segja það ekki raunhæft fyrir félaga sína að vinna til 75 ára aldurs.

Frétt Dagens Nyheter