Íbúar Papúa á Nýju-Gíneu. Reuters

Lögregla í Papúa héraði á Nýju-Gíneu í Indónesíu handtók í dag tékkneskan ferðamann, vegna þess að hann tók ljósmyndir af kröfugöngu fyrir sjálfstæði héraðsins.

Ferðamaðurinn, hinn 35 ára gamli Petr Zamecnik, var handtekinn í bænum Manokwari, um 400 km austur af hinum fjölfarna ferðamannastað Raja Ampat þar sem vinsælt er að stunda köfun. Lögregla segist hafa yfirheyrt hann vegna þess að vegabréfsáritun hans gaf honum heimild inn í landið sem ferðamaður.  

Papúa var innlimað í Indónesíu árið 1969 með þjóðaratkvæðagreiðslu sem margir telja að hafi verið fölsuð. Yfirvöld í Jakarta hafa ströng tök á svæðinu og halda uppreisnarmönnum þar niðri með hjálp hersins og lögreglu. Strangar hömlur eru settar á ferðir útlendinga til Papúa og á fréttaflutning frá svæðinu.

„Hann átti að vera í fríi í Raja Ampat en í staðinn komum við að honum takandi myndir af mótmælum,“ hefur Afp eftir lögreglustjóranum Agustinus Supriyanto um ferðamanninn. Um 100 innfæddir Papúamenn fóru í kröfugöngu að húsi ríkisstjórans og kölluðu slagorðin „Frelsið Papúa, við erum ekki Indónesíumenn“. Þá báru þeir borða sem sýndi morgunstjörnu Papúa, tákn þeirra sem hefur verið bannað.

Zamecnik hefur verið afhentur yfirvöldum að sögn lögreglu.