Þrír indverskir ráðherrar voru staðnir að því að horfa á klám í farsíma á þingfundi. Reuters

Þrír héraðsráðherrar í suðurhluta Indlands sögðu af sér í dag vegna ásaana um að þeir hafi horft á klám í þinghúsinu. Ráðherrarnir eru allir úr hægriflokknum Bharatiya Janata Party (BJP) sem situr í stjórn, en sjónvarpsfréttamenn náðu myndum af þeir að horfa á klám á farsímum sínum á þriðjudag, á meðan aðrir þingmenn rökræddu lagafrumvarp.

„Við höfum sagt af okkur til að verða ekki flokknum okkar til skammar og gefa ekki stjórnarandstöðunni færi á því að trufla þingfund í dag,“ sagði samvinnuráðherrann Laxman Savadi við blaðamenn í dag. „Við vorum að horfa á myndskeið af atviki sem átti að taka til formlegrar umræðu, vegna reif-partýs sem haldið var á eyju St. Maríu. Þetta var ekki klám,“ sagði ráðherrann.

Auk hans sögðu af sér ráðherra réttinda kvenna og barna og ráðherra sjávarútvegs og hafna. Í sjónvarpsupptökunni sést að í myndskeiðinu horfðu þeir á konu dansa, klæða sig úr fötunum og taka þátt í kynlífsathöfn. Þeir létu farsímann ganga á milli sín til að horfa á myndskeiðið.

Klám er ólöglegt í Indlandi en engu að síður er mjög auðvelt að nálgast það þar.