Kínverskur drengur sem fæddist 7,04 kíló er stolt foreldra sinna en þau eru að sama skapi undrandi yfir stærð hans. Kínverskir fjölmiðlar telja að þetta sé stærsta barn sem fæðst hefur í Kína svo vitað sé.

Foreldrar drengsins, sem fengið hefur nafnið Chun Chun, eru eins og gefur að skilja afskaplega sælir með hann og ekki síst með að slíkt barn hafi fæðst þeim á ári drekans, sem talið er gott ár til getnaðar og fæðinga. „Konan mín hegðaði sér ekkert öðru vísi en aðrar þungaðar konur. Hún át og drakk eðlilega. En svo fæðir hún þennan stóra, feita strák. Í dag er fyrsti dagur vors samkvæmt kínverska dagatalinu og þetta er drekabarn. Ég er afar hamingjusamur með hann," segir faðirinn, Han Jingang.

Móðirin, Wang Yujuan, segir að dóttir þeirra, sem nú er 6 ára, hafi verið rétt rúm 4 kíló í fæðingu og því hafi hún ekki átt von á svo stóru barni. „Mér fannst ég vera stirðari en þegar ég gekk með dóttur mína. Bumban á mér var stærri en þá en ég giskaði á að hann myndi vega milli 4,5 til 5 kíló. Ég bjóst aldrei við því að hann yrði 7 kíló.“