Tugir óbreyttra borgara létust í borginni Homs í Sýrlandi í morgun þegar her landsins gerði atlögu að borginni, fimmta daginn í röð. Fjöldi bygginga hrundi í árásinni. Þar er nú rafmagnslaust og farið er að skorta vatn og mat. Skorið hefur verið á öll samskipti við borgina.

Sýrlensk mannréttindasamtök segja að flest fólkið hafi látist í skothríð hersins. Þrjár fjölskyldur voru einnig myrtar í nótt af glæpahópi, sem  heitir Shabiba og er studdur af stjórn Assads Sýrlandsforseta.

„Við eigum von á að fleiri eigi eftir að finnast látnir því margir liggja enn undir rústum húsanna,“ segir Rami Abdel Rahman yfirmaður mannréttindasamtakanna.

Herinn mun hafa einblínt á Baba Amr hverfið, en þar eru nú flestar byggingar hrundar. 

„Skothríðin hefur verið stöðug frá sólarupprás. Nú er verið að nota eldflaugar og sprengivörpur,“ sagði Omar Shaker, einn íbúa í borginni. AFP-fréttastofan náði tali af honum í gegnum gervihnattasíma í morgun, en skorið hefur verið á allar samskiptaleiðir. Ekkert rafmagn er í borginni og símalínur hafa verið eyðilagðar.. „Allir innviðir samfélagsins eru gjörónýtir. Vatnstankar hafa verið eyðilagðir og það er farið að bera á matarskorti,“ sagði Shaker.

Hann segir margt benda til þess að skothríðin sé undanfari harðari árása, þar sem her muni sækja inn í borgina.

Ekki liggur fyrir hversu margir hafa látist frá því að árásir stjórnarhersins hófust af fullum þunga á föstudaginn, en ljóst er að um er að ræða mörg hundruð manns. Meira en 6000 hafa látist frá því að mótmæli gegn Assad forseta hófust í Sýrlandi í mars á síðasta ári.