Reuters

Breskur kennari sem átti í kynferðissambandi við 16 ára nemanda sinn sleppur við fangelsisvist vegna málsins vegna þess að nemandinn leitaði sjálfur eftir sambandi við hann og gerði sér far um að ögra honum kynferðislega samkvæmt fréttavef breska dagblaðsins Daily Telegraph.

Kennarinn, hinn 31 árs gamli Andrew Chesney, fékk í staðinn tveggja ára skilorðsbundinn dóm og þarf að inna af hendi 300 klukkustunda samfélagsvinnu. Þá verður hann settur á skrá yfir kynferðisafbrotamenn og var gert að greiða eitt þúsund pund í málskostnað.

Fram kom í máli dómarans sem dæmdi í málinu að Chesney hefði ekki leitað eftir kynferðissambandi við nemendur sína. Stúlkan hefði átt frumkvæði að sambandinu sínu við hann og viðurkennt að henni hafi litist vel á hann og sóst eftir því að vera í nærveru hans. Þá kom fram að stúlkan hefði gengið í stuttum pilsum og flegnum skyrtum.

„Þetta er eitthvað sem kennarar þurfa að lifa við og þú varst aðeins byrjandi. Þú lést undan kynferðislegum áhuga ungrar konu og greipst tækifærið um tíma mörgum sinnum til þess að fá kynferðislega fullnægingu,“ sagði dómarinn.

Chesney var handtekinn í janúar á síðasta ári en ákvörðun var tekin um að ákæra hann í september síðastliðinn. Hann hafði þá ekki áður komið við sögu lögreglu.