Varnarmálaráðherrar Bretlands, Ástralíu og Bandaríkjanna. Frá vinstri: Philip Hammond, varnarmálaráðherra Bretlands, Stephen Smith, varnarmálaráðherra Ástralíu og Leon Panetta, varnarmálaráðherra Bandaríkjanna. Reuters

Ástralir neita ásökunum þess efnis að þeir hafi átt mikilvæga aðild að leynifangelsi í eyðimörk í Írak, þar sem mönnum var haldið föngnum án dóms og laga. Breska dagblaðið The Guardian fullyrðir að samkvæmt bandarískum herskjölum hafi úrvalssveit ástralskra hermanna verið hluti af verkefni sem nefndist H1 árið 2003.

Að auki hafi sérveit breska hersins átt aðild að verkefninu sem var undir stjórn Bandaríkjamanna.

Slík leynifangelsi eru kölluð „svartir staðir“ og vísar það til þeirrar starfsemi sem þar fer fram og að þau eru á vitneskju fárra. Frægasti svarti staðurinn er líklega fangelsi Bandaríkjamanna í Abu Ghraib í Bagdad í Írak. Fáir vissu af tilvist þess, fyrr en myndir láku út, sem sýndu illa meðferð Bandaríkjamanna á íröskum föngum þar.

Alexander Downer, sem var utanríkisráðherra Ástralíu á þessum tíma, neitar þessu. „Ég tel að þetta sé hreinasti þvættingur,“ sagði hann í viðtali við ástralska útvarpsstöð. „Ef ég man rétt, þá héldum við engum mönnum föngnum, en við létum þá í hendur annarra landa; Bandaríkjanna og Bretlands. Þau voru aðilar að alþjóðlegum sáttmálum um meðferð fanga í aðstæðum sem þessum.“

Stephen Smith, varnarmálaráðherra Ástralíu, segir að ekkert sé hæft í umfjöllun blaðsins en tók fram að hann vissi lítið um málið. „Þetta var áður en núverandi ríkisstjórn tók við völdum,“ segir hann.