Amur-hlébarði. Reuters

Fimm manns hafa látið lífið í Nepal síðustu daga eftir árásir hlébarða. Síðasta fórnarlambið er 14 ára gömul stúlka sem var að slá gras þegar dýrið réðst á hana og dró hana inn í nærliggjandi skóg. Lík hennar fannst í gær, „sundurslitið og étið neðan háls” að sögn lögreglu.

Fórnarlömb hlébarðans eru allt konur, þrjár ungar stúlkur og 35 ára gömul þunguð kona. Lögregla telur að í öllum tilfellum sé um sama dýrið að ræða. Bishnu Bahadur Karki, fulltrúi lögreglu í þorpinu sem er nærri landamærum Indlands, segir að heimamenn hafi óskað leyfist frá yfirvöldum til að fá að fella dýrið en því hafi verið hafnað þar sem lögin heimili slíkt ekki.

„Þá óskuðum við þess að hlébarðinn yrði handsamaður og fluttur í dýragarð en því var líka hafnað. Þorpsbúar og lögregla reyna hvað þeir geta að koma þessum hlébarða úr umferð,” segir Karki. Þorpsbúar fullyrða að þrír til viðbótar hafi verið drepnir í nágrannaþorpi Indlandsmegin við landamærin. „Við erum hrædd við að vera ein á ferð,” hefur Afp eftir Shiva Singh Saud, skólastýru grunnskóla þorpsins. „Fleiri gætu orðið fyrir árás ef hlébarðinn er ekki stöðvaður strax.”

Flestir hlébarðar Nepal hafast við á sléttunum og í skógi vöxnum fjallshlíðum, þar sem árekstur við mannfólk er viðvarandi vandamál. Á síðasta ári voru sjö manns drepnir af hlébörðum á sama svæði og árásirnar eru nú og í október síðastliðnum réðst hlébarði á 4 ára gamlan dreng í fjallendi Mið-Nepal og dró lík hans burt.