Baltasar Garzón í réttarsalnum í dag Reuters

Hæstiréttur Spánar hefur dæmt spænska rannsóknardómarann Baltasar Garzón sekan um að hafa heimilað ólöglegar upptökur af samtölum lögmanna.

Garzón var sakaður um að hafa misnotað valdheimildir sínar með því að kafa ofan í glæpi frá tímum borgarastyrjaldarinnar á Spáni og valdatíð Franciscos Francos.

Samkvæmt frétt BBC svipti hæstiréttur Garzón lögmannsréttindum í ellefu ár.

Hann á yfir höfði sér fleiri málaferli en Garzón er einnig sakaður um að hafa hætt rannsókn á yfirmanni stærsta banka Spánar, Santander, eftir að hafa fengið greitt fyrir námskeið sem kostað var af bankanum. Ekki er komin tímasetning á þau réttarhöld.

Talið er að um 114 þúsund manns hafi horfið á tímum borgarastyrjaldarinnar á Spáni á árunum 1936-1939.

Þegar málflutningur hófst í málinu fyrir hæstarétti í síðasta mánuði lögðu saksóknararnir  til að dómstóllinn léti málið niður falla.

Saksóknararnir og verjendur Garzóns kváðust sammála um að hann hefði ekkert gert af sér. Tvenn hægrisamtök höfðuðu málið gegn Garzón fyrir að hefja rannsókn á hvarfi 114 þúsund manna í borgarastyrjöldinni 1936 til 1939 og í tíð einræðisherrans. Í ákærunni á hendur Garzón segir að hann hafi gengið of langt því að tveimur árum eftir að Franco féll frá hafi verið gert samkomulag um sakaruppgjöf vegna þessara mála. Það var gert til að auðvelda breytinguna frá einræði til lýðræðis. Garzón heldur því hins vegar fram að umrædd afbrot heyri undir glæpi gegn mannkyni og sakaruppgjöfin nái því ekki til þeirra.

Garzón komst fyrst í heimsfréttirnar þegar hann krafðist þess árið 1998 að Augusto Pinochet, fyrrverandi einræðisherra í Síle, yrði framseldur frá London. Hann reyndi einnig að ná í ráðamenn úr herforingjastjórninni í Argentínu fyrir að hafa varpað stjórnarandstæðingum í sjóinn úr flugvélum. Hann hefur barist gegn eiturlyfjahringum og hryðjuverkamönnum.

Hann stefndi Osama bin Laden og rannsakaði meðferð grunaðra hryðjuverkamanna í haldi Bandaríkjamanna í Guantanamo-fangelsinu á Kúbu. Þá stefndi hann George Bush, fyrrverandi forseta Bandaríkjanna, vegna þess að hann taldi að Bandaríkjamenn hefðu brotið gegn þjóðarétti þegar þeir réðust inn í Írak. Í upphafi níunda áratugar liðinnar aldar kom hann stjórnarliðum sósíaldemókrata á Spáni í fangelsi fyrir að hafa látið ráða meinta meðhlaupara ETA, skæruliðasamtaka Baska, af dögum.