Leggja fram kvörtun hjá SÞ
Argentínumenn hafa orðið órólegir eftir að bresk herskip hafa sést í kringum Falklandseyjar. REUTERS
Argentínsk stjórnvöld munu á morgun formlega leggja fram kvörtun vegna þess sem þeir kalla „hervæðingu“ Falklandseyja.
Í skýrslu sem á morgun verður afhent Sameinuðu þjóðunum eru bresk stjórnvöld sökuð um að brjóta um 40 samþykktir Sameinuðu þjóðanna um deilur þjóðanna tveggja, sagði utanríkisráðherra Argentínu í dag.
Utanríkisráðherrann, Hector Timerman, mun sjálfur koma kvörtuninni á framfæri við sendiherra Togo, Kodjo Menan, sem nú stýrir Öryggisráðinu. Hann hyggst sömuleiðis koma kvörtuninni á framfæri við Ban Ki-moon, aðalritara Sameinuðu þjóðanna, og aðra háttsetta embættismenn þar á bæ.
Timerman mun koma á framfæri „fordæmingu Argentínustjórnar á hervæðingunni sem Bretland stendur fyrir á Malvina-eyjum (Falklandseyjum) í Suður-Atlantshafi,“ segir í yfirlýsingu hans.
Frá 25 ára hátíðarhöldum vegna sigurs Breta um yfirráð yfir Falklandseyjum árið 2007. REUTERS
Spenna hefur aukist á milli landanna tveggja að undanförnu, en brátt styttist í að 30 ár séu frá upphafi Falklandseyjastríðsins, sem olli talsverðu mannfalli í átökum Bretlands við Argentínu, þegar þeir síðarnefndu lýstu því yfir að þeir réðu yfir eyjunum.
Ríkisstjórn Margrétar Thatcher brást ókvæða við með því að senda herskipaflota landsins til eyjanna hinn 2. apríl 1982 með áðurnefndum afleiðingum sem endaði með sigri Bretlands. Stríðið stóð í 74 daga og 649 Argentínumenn og 255 Bretar misstu lífið í því ásamt þremur íbúum Falklandseyja.
Forseti Argentínu sendi einnig frá sér yfirlýsingu í dag um að hún muni sjálf koma á framfæri mótmælum sínum við Sameinuðu þjóðirnar.
Ban Ki-moon, aðalritari Sameinuðu þjóðanna mun fá kvartanir opinberlega frá yfirvöldum í Argentínu. REUTERS
Bretar hafa þó gert lítið úr kvörtunum Argentínustjórnar og sagt að þeir muni ekki taka þátt í neinum samningaviðræðum um Falklandseyjar og að Sameinuðu þjóðirnar styðji þá afstöðu.
Bretland á fast sæti í Öryggisráðinu og gæti því sjálft beitt neitunarvaldi í öllum ályktunum um lausnir á málum þar.
„Breska ríkisstjórnin telur engan vafa á yfirráðum landsins yfir Falklandseyjum,“ sagði talskona breska utanríkisráðuneytisins við fréttastofuna AFP í dag.
Eyjarnar hafa verið undir breskum yfirráðum síðan 1833, en þar búa um 3.000 manns.
Argentínumenn hafa verið afar ósáttir við bresk herskip sem sést hafa á Suður-Atlantshafi og vera hertogans af Cambridge, sem nú sinnir herþjónustu á eyjunum, hefur ekki dregið úr óróleika Argentínustjórnar.
Hafa nágrannaþjóðir Argentínu stutt þá með því að gefa út að skip sem sigla undir fána Falklandseyja fái ekki að leggjast að í höfnum þeirra.
Hertoginn af Cambridge, sem er annar í erfðaröð bresku krúnunnar, sinnir nú herþjónustu á eyjunum. AP
