Janet Wolfenbarger varð á dögunum fyrsti fjögurra stjörnu hershöfðingi Bandaríkjahers. Reuters

Bandaríkjaher hefur tilkynnt fyrirætlanir um að slaka á þeim höftum sem hingað til hafa gilt um kvenhermenn sem gegna þjónustu í átökum. Þótt konum verði áfram meinað að gegna hættulegustu stöðunum sem fótgönguliðar eða í sérsveitunum, þá verður þeim hleypt nær vígvellinum.

Baráttuhópur kvenna í hernum segir hinsvegar að stefnubreytingin nái ekki nógu langt. Konur eru að sögn BBC um 14% bandarískra hermanna. En þessar nýju reglur þykja endurspegla nýjan veruleika sem stríðin í Írak og Afganistan hafa leitt ljós. Því í stríði þar sem víglínan verður sífellt á grárra svæði hefur reynst nánast ómögulegt að halda kvenhermönnum frá vígvellinum.

Verði fyrirætlanirnar að veruleika opnar það konum í hernum leið að 14.000 stöðum sem þeim var áður meinað að gegna, bæði í sjó- og landhernum. Til þessa hafa kvenhermenn fyrst og fremst getað gegnt störfum s.s. sem tæknimenn í skriðdrekum og við flugskeytastýringu. Hermennska þeirra hefur verið takmörkuð við stórfylkingar en nú verður þeim hleypt í liðssveitirnar. Engu að síður verða 238.000 stöður í hernum, um fimmtungur, þeim enn utan seilingar.