Sjálfsmorðstíðni ungmenna í Rússlandi er há. Morgunblaðið/Golli

Sjálfsmorðstíðni rússneskra ungmenna fer stöðugt vaxandi og er næstum því þrefalt hærri en meðaltalstölur fyrir heiminn sýna. Fjögur þúsund ungir Rússar á aldrinum 15-19 ára taka eigið líf á hverju ári.

Þarlendir sálfræðingar hafa af þessu þungar áhyggjur. Yfirmaður geðlæknismála hjá rússneska heilbrigðisráðuneytinu, Zurab Kekelidze, segir að leggja þurfi meiri áherslu á sálfræðiþjónustu í skólum og kallar jafnframt rétttrúnaðarkirkjuna til ábyrgðar.

Hann fordæmir vefsíður, þar sem mismunandi aðferðum við sjálfsmorð er lýst, en þær munu vera nokkuð margar og fjölsóttar.

Tvær unglingsstúlkur stukku ofan af þaki íbúðarbyggingar í bænum Lobnya, skammt frá Moskvu fyrir nokkrum dögum. Það var þriðja sjálfsmorð unglinga, þar sem tveir taka líf sitt saman, síðan í október.

Lögregla rannsakar nú dauðsfall tólf ára drengs, sem virðist hafa hengt sig á heimili sínu í Síberíu.

Þrátt fyrir þessa fjölgun á sjálfsmorðum ungmenna, hefur sjálfsmorðum í Rússlandi fækkað í heild frá umbrotatímunum á tíunda áratugnum. Þá voru 42 sjálfsmorð á hverja 100.000 íbúa, en nú eru þau 23,5.