Mitt Romney. Reuters

Mitt Romney, frambjóðandi í forvali repúblikana til forsetaframboðs, lofar því að sameina repúblikana og að sigra Barack Obama. Hann segir kosningarnar vera „baráttu um bandarísku sálina“. Forkosningar fara fram í Maine-ríki í dag.

Þetta sagði Romney á ráðstefnu í morgun, þar sem hinir þrír frambjóðendurnir voru einnig staddir. „Landið sem við elskum er í hættu,“ sagði hann ennfremur á ráðstefnunni. „Ég er sannfærður um það að ef við vinnum vinnuna okkar, ef við tökum forystu með sannfæringu og einlægni að leiðarljósi, þá mun forsetatíð Obama verða skráð á spjöld sögunnar sem síðasta misheppnaða tilraun frjálslyndisins.“

Romney hefur verið gagnrýndur fyrir að ná ekki til íhaldssamasta arms flokksins og hefur honum m.a. verið legið á hálsi fyrir að hafa ekki tekið nógu afdregna afstöðu til fóstureyðinga. Hann tók öll tvímæli af því í dag þegar hann sagðist vera „Pro-life“ eða á móti fóstureyðingum.

Hann segist hafa verið afar íhaldssamur í embætti þegar hann var ríkisstjóri í Massachusetts. „Ég lækkaði skatta, kom jafnvægi á fjármál og skar niður kostnaðarsöm opinber verkefni“. 

Hann hét því að Bandaríkin myndu hætta að fjármagna Mannfjöldasjóð Sameinuðu þjóðanna, „sem styður við hina villimannslegu stefnu Kínverja um eitt barn á fjölskyldu“ og að „snúa við öllum reglugerðum Obama sem ráðast að trúfrelsi og ógna lífi saklausra“.

Hann sagðist ekkert skammast sín fyrir fortíð sína sem farsæll kaupsýslumaður. „Ég þarf ekkert að fyrirverða mig fyrir að hafa notið velgengni,“ sagði Romney við mikinn fögnuð viðstaddra.