„Við munum ekki biðjast afsökunar og hverfa frá þeim gildum okkar, sem gera land okkar svo stórkostlegt, til þess að geta unnið sigur í nóvember,“ sagði Rick Santorum, frambjóðandi í forvali Repúblikana til forsetaframboðs, á stjórnmálaráðstefnu, CPAC 2012, í morgun, þar sem allir fjórir frambjóðendurnir í forvalinu voru samankomnir.

Þar var meðal annars rætt um þær fyrirætlanir Obama að skylda sjúkratryggingar til að greiða getnaðarvarnir fyrir konur. Það hefur vakið hörð viðbrögð ýmissa trúarhópa og einnig meðal Repúblikana. „Þetta snýst ekki um getnaðarvarnir,“ sagði Santorum. „Þetta snýst um frelsi og afskipti ríkisins af lífi almennings. Þessu verður að linna.“

Newt Gingrich sagði að Obama væri varhugaverður þegar kæmi að trúmálum. „Þetta er maður sem er staðráðinn í því, þ.e.a.s. ef hann verður endurkjörinn, að lýsa yfir stríði við kaþólsku kirkjuna,“ sagði Gingrich sem er kaþólskur.

Hann hét því að yrði hann kjörinn, myndi hann afturkalla að minnsta kosti 40% af öllum þeim málefnum sem Obama hefur komið í framkvæmd.