Leiðtogar tveggja stærstu verkalýðsfélaga á Spáni; Ignacio Fernandez Toxo hjá CCOO og Candido Mendez hjá UGT. Reuters

Tvö stærstu verkalýðsfélög Spánar hvetja til fjöldamótmæla eftir rúma viku, sunnudaginn 19. febrúar. Mótmæla á niðurskurðaráformum ríkisstjórnarinnar. 

„Við viljum að stræti og torg Spánar fyllist af háværum mótmælendum 19. febrúar,“ sagði Ignacio Fernandez Toxo, formaður CCOO-verkalýðsfélagsins á blaðamannafundi í morgun.

„Við munum koma af stað fjöldahreyfingu, sem mun vonandi vaxa,“ bætti Toxo við.

Spurður að því hvort verið væri að hvetja til allsherjarverkfalls, sagði hann að fulltrúar verkalýðsfélaganna myndu heimsækja vinnustaði og útskýra fyrir þeim að niðurskurðaráformin gengju gegn grunnstoðum spænsks samfélags um félagslegan jöfnuð og að með þeim væri að skerða réttindi vinnandi fólks.

Ríkisstjórn Spánar skerti í gær greiðslur sem greiddar eru í uppsagnarfresti í tilraun til að fást við aukinn kostnað af atvinnuleysi, sem nú er tæp 23%. Atvinnuleysi meðal ungs fólks er tæp 50%.

Eftir breytingarnar munu þeir sem missa störf sín fá greidda 33 daga fyrir hvert ár sem þeir hafa unnið og 20 daga greidda í uppsagnarfrest, en áður voru greiddir 45 dagar.

Candido Mendez, formaður veklalýðsfélagsins UGT, segir að niðurskurðurinn muni eyðileggja vinnumarkaðinn og auka á óöryggi fólks.