Fer The Sun sömu leið og News ff the World? Reuters

Fjölmiðlakóngurinn Rupert Murdoch er væntanlegur til Bretlands í vikunni til að takast á við vaxandi fjölmiðlafár í kringum veldi hans. Fimm blaðamenn dagblaðsins The Sun, sem er í eigu Murdochs, hafa verið handteknir.

Murdoch segist ætla að standa vörð um The Sun, mest selda blað hans á Bretlandi, en engu að síður óttast starfsmenn að hann hætti útgáfu þess, líkt og hann gerði með slúðurblaðið News Of the World þegar umræða um hleranir blaðamanna þar stóð sem hæst.

Blaðamennirnir sem voru handteknir í gær eru sakaðir um að hafa mútað lögreglunni og opinberum starfsmönnum til að fá upplýsingar. Er þetta enn eitt höggið sem fjölmiðlaveldi Murdochs verður fyrir á nokkrum mánuðum.

Heimildarmaður AFP-fréttastofunnar segir að Murdoch ætli að funda með blaðamönnum The Sun og ræða framtíð blaðsins. Hann keypti blaðið árið 1969 og selst það í um 2,5 milljónum eintaka dag hvern.

Forstjóri News International, breska fjölmiðlafélags Murdochs, segir í tölvupósti til starfsmanna The Sun að Murdoch ætli sér að „standa með The Sun“ á ögurstundu.

Meðal þeirra sem handteknir voru í gær eru aðstoðarritstjórinn Geoff Webster, myndritstjórinn John Edwards og blaðamaðurinn John Kay. Þá voru þrír lögreglumenn og opinberir starfsmenn einnig handteknir, grunaðir um að hafa þegið mútur. Þeim hefur nú öllum verið sleppt úr haldi.

Rupert Murdoch. Reuters