Frá Sýrlandi Reuters

Stjórnarherinn í Sýrlandi hélt áfram árásum sínum á borgina Homs í morgun. Sýrlensk stjórnvöld hafa hafnað tillögu Arababandalagsins um að senda friðarsveitir til landsins.

Herinn skaut úr sprengjuvörpum á hverfið Baba Amr skömmu fyrir sólarupprás í morgun og hersveitir handtóku uppreisnarmenn í Daraa-héraði, sem er í suðurhluta landsins.

„Baba Amr-hverfið hefur verið undir árásum síðan klukkan fimm í morgun,“ sagði talsmaður sýrlenskra mannréttindasamtaka. „Hersveitir gerðu áhlaup og handtóku fólk í borginni Sasra al-Sham, eftir að sprengja sprakka þar.

Harðvítug átök voru á milli uppreisnarmanna og hersins, sem fór inn í borgina Lajat og handtók þar mæður fjögurra uppreisnarmanna.“

Mannréttindasamtökum ber saman um að hersveitir Assads forseta hafi drepið að minnsta kosti 500 manns í borginni Homs frá 4. febrúar, en þá hóf herinn að varpa þar sprengjum og beita skriðdrekum.

Eftir langar viðræður í Kaíró í gær tilkynnti Arababandalagið að það hefði fallist á að setja sig í samband við uppreisnarmenn í Sýrlandi. Bandalagið hyggst fara fram á við Sameinuðu þjóðirnar að þær sendi friðarsveitir sínar þangað.

Sendiherra Sýrlands í Kaíró fordæmdi þessa yfirlýsingu og sagði hana endurspegla „móðursýki“ þeirra sem í hlut ættu.

Burhan Ghalioun, leiðtogi uppreisnarmanna og Þjóðarráðs Sýrlands, fagnar aðgerðum Arababandalagsins og segir þær fyrsta skrefið í átt að falli stjórnar Assads.

Sýrlenskir flóttamenn frá borginni Homs streyma nú yfir landamærin til Líbanon. Sögur þeirra eru skelfilegar. Rauði hálfmáninn í Sýrlandi og Alþjóða Rauði krossinn dreifa nú matvælum, hreinlætisvörum, lyfjum og ýmsum hjálpargögnum í Homs. 

Arababandalagið og vestræn ríki munu gera enn eina tilraunina í Öryggisráði Sameinuðu þjóðanna núna í vikunni til að pressa á Assad Sýrlandsforseta.

Talið er að meira en 6.000 manns hafi látist í mótmælunum í Sýrlandi sem hófust í mars í fyrra.