mbl.is/Ásdís Ásgeirsdóttir

Beiðni bresks karlmanns, sem fundinn var sekur fyrir að pynta og nauðga ungri konu  um að fá að dvelja í Ástralíu, hefur verið hafnað. Glæpinn framdi maðurinn á þann hátt sem helst þykir minna á kvikmyndina „Lömbin þagna“

Maðurinn, hinn 63 ára gamli Leslie Neil Cunliffe, var látinn laus í apríl eftir að hafa verið í fangelsi í 12 ár. Áströlsk yfirvöld aftukölluðu dvalarleyfi hans og hafa verið að undirbúa brottrekstur hans úr landi. Hann barðist gegn því, en úrskurður féll í morgun þess efnis að honum verði gert að yfirgefa landið hið snarasta.

Cunliffe framdi glæpinn árið 1999. Þá dulbjó hann sig sem lögreglumann og nam unga konu á brott með því að hóta henni með byssu. Hann læsti hana síðan inni í skúr í bakgarði sínum og voru dýnur festar á veggi skúrsins til að dempa allt hljóð.

Hann batt konuna við stól og nauðgaði henni og pyntaði á ýmsan hátt. Síðan festi hann eftirlíkingu af sprengju við hana og tók myndir af henni þar sem hann krafðist einnar milljónar ástralskra dollara í lausnargjald.

Konan slapp, þegar Conliffe brá sér frá og kona heyrði neyðaróp hennar.

Innflytjendamálaráðherra Ástralíu, Chris Bowen, segist hafa íhugað þetta mál vandlega.  „Ég komst að þeirri niðurstöðu að hann er ekki þannig gerður að við viljum að hann dvelji í landinu.“

Cunliffe hefur búið í Ástralíu í meira en 40 ár. Hann segir brottvikningu sína vera brot á alþjóðlegum mannréttindalögum.