Mótmælendur í Sýrlandi brenna myndir af Hafez Al Assad, föður Bashars. REUTERS

Ríkisstjórn Ítalíu styður sameiginleg áform Arababandalagsins og Sameinuðu þjóðanna um friðargæslu á Sýrlandi til að binda enda á blóðbaðið sem þar hefur geisað, sagði Giulio Terzi, utanríkisráðherra Ítalíu, í dag.

„Ítalía telur brýnt að stöðva allar gerðir af ofbeldi á Sýrlandi og í því skyni styðjum við beiðnina um að senda sameiginlega friðargæslu á vegum Sameinuðu þjóðanna og Arababandalagsins til að fylgja málum eftir,“ sagði ráðherrann.

„Við vonum að það náist breið samstaða sem fyrst frá alþjóðasamfélaginu.

Ítalía heldur áfram að styðja Arababandalagið í viðleitni sinni til að finna friðsamlega og lýðræðislega lausn á vandamálum Sýrlands og fagnar útkomu af fundi utanríkisráðherranna í Kaíró í gær,“ bætti hann við.

Frá fundi Arababandalagsins um málefni Sýrlands. Reuters

Þá bætti Terzi einnig við að „Ítalía og Arababandalagið deila þeirri skoðun að það sé nauðsynlegt að veita stjórnarandstöðunni á Sýrlandi pólitískan stuðning“.

Þá bætti hann við að hann teldi nauðsynlegt að styrkja tengslin á milli aðila og að það væri algjört forgangsatriði til þess að siðbætur í stjórn Sýrlands gætu hafist með stuðningi frá alþjóðasamfélaginu.

Arababandalagið sagði í gær að það samþykkti að taka upp samband við stjórnarandstöðuna á Sýrlandi og að það hygðist óska eftir samstarfi frá Sameinuðu þjóðunum um friðargæslu í landinu.

Eftir maraþonfund í Kaíró tilkynntu fulltrúar bandalagsins að þeir hefðu formlega lokið eigin skoðun á málefnum Sýrlands, en hlé var gert á henni vegna aukinna óeirða í síðasta mánuði.

Fjöldamótmæli hafa verið í Sýrlandi gegn Bashar al-Assad, forseta landsins. Myndin er frá Kafranbel. Reuters

Sýrlandsstjórn hefur markvisst hafnað inngripum utanríkisráðherra Arababandalagsins um að styðja við stjórnarandstöðuna í landinu og sömuleiðis kalli bandalagsins eftir friðargæslu í landinu.

Arababandalagið hefur óskað eftir því að Sameinuðu þjóðirnar komi sameiginlega að friðargæslu í Sýrlandi. mbl.is