The Sun Reuters

Blaðamenn breska dagblaðsins The Sun hafa haft samband við Blaðamannafélag Bretlands þar sem þeir íhuga að höfða mál gegn útgáfufyrirtæki blaðsins, News, sem er í eigu Ruperts Murdochs.

Fimm blaðamenn The Sun voru handteknir í síðustu viku í tengslum við rannsókn á mútugreiðslum til lögreglumanna.

Von er á Murdoch til Bretlands í dag eða á morgun þar sem hann ætlar að funda með blaðamönnum eftir að hafa heitið því að gefa blaðið áfram út þrátt fyrir spillingarmálið.

Murdoch lét hætta útgáfu vikublaðsins News of the World síðasta sumar eftir að blaðið varð uppvíst af því að hafa hlerað síma fjölmargra einstaklinga. 

Um síðustu helgi handtók lögreglan fimm blaðamenn The Sun vegna gruns um að þeir hafi mútað lögreglumönnum. Mikil reiði braust út á ritstjórn The Sun í kjölfarið og skoðar Blaðamannafélagið nú hvernig það getur varið starfsmenn ritstjórnar The Sun gegn stjórnendum blaðsins sem virðast ætla að kasta blaðamönnunum fyrir úlfa, líkt og forsvarsmenn Blaðamannafélagsins orða það.

Að sögn framkvæmdastjóra blaðamannafélagsins snýst málið meðal annars um rétt blaðamanna um að vernda heimildarmenn sína og er Blaðamannafélagið að íhuga að fara með málið fyrir Mannréttindadómstól Evrópu. En dómstóllinn hefur ítrekað dæmt blaðamönnum í vil þegr þeir neita að gefa upp heimildarmenn sína.