Gera áætlun um að Grikkir yfirgefi evruna

Þýsk stjórnvöld hafa búið til áætlun um hvernig Grikkland getur yfirgefið evruna. Skuldir Grikklands halda áfram að aukast og innan Evrópusambandsins á sér stað umræða um að ekki sé víst að sú skuldaniðurfelling og lánafyrirgreiðsla sem unnið hefur verið að dugi Grikkjum.

Í breska blaðinu Telegraph segir að fjármálaráðherra Þýskalands þrýsti nú á um að Grikkir lýsi sig gjaldþrota. Fjármálaráðherrar ESB hittast á fundi á morgun til að ræða skuldamál Grikklands og um stöðu viðræðna um skuldaniðurfellingu.

Skilyrði fyrir lánafyrirgreiðslunni hafa valdið miklum mótmælum í Grikklandi og niðurskurðurinn er svo mikill að Wolfgang Schäuble, fjármálaráðherra Þýskalands, efast um að nokkur ríkisstjórn geti hrundið honum í framkvæmd.

Telegraph hefur eftir ónafngreindum embættismanni að jafnvel þó að Grikkjum takist að standa við loforð sín sé alls óvíst að takist að lækka skuldir niður í 120% af landsframleiðslu árið 2020 eins og stefnt væri að.

• 1 blogg um fréttina

Bloggað um fréttina

• Heimssýn: Raðbjörgun Grikklands er farsi