Eldsvoðinn sem kostaði 359 fanga lífið í fangelsi í Hondúras í síðustu viku var slys og kviknaði líklega út frá sígarettuglóð. Þetta eru fyrstu niðurstöður skýrslu yfirvalda um málið.

„Fyrstu niðurstöður benda til þess að þetta hafi verið slys. Sá möguleiki að um glæpsamlegt athæfi hafi verið að ræða hefur verið útilokaður," sagði varnarmálaráðherra Hondúras, Pompeyo Bonilla, í dag.

Eldsvoðinn sem braust út hinn 14. febrúar í Comayagua-fangelsinu er mannskæðasti eldsvoði sem komið hefur upp í fangelsi í rúma öld. Afleiðingarnar hafa vakið athygli á viðvarandi vanda í fangelsismálum Hondúras, þar sem fangelsi eru öll yfirfull.

Bonilla segir ríkjandi kenningu um eldsupptök þá að menn hafi verið að reykja á eldfimum rúmdýnum sem hafi fuðrað upp og eldurinn breiðst frá þeim út um þéttskipað fangelsið. Bandarískir sérfræðingar hafa hjálpað til við rannsókn eldsins.

Ættingjar hinna látnu halda því fram að sár eftir byssukúlur hafi verið á sumum líkanna. Þeir fullyrða einnig að lögreglu kunni að hafa verið greitt fyrir að hella bensíni um fangelsið til að láta líta út fyrir að fangar hafi freynt að flýja. Yfirvöld neita þessu.

Forseti Hondúras, Porfirio Lobo, sagði í dag að fjölskyldur fórnarlambanna mundu fá „sanngjarnar“ bætur greiddar.