Mótmælandi með mynd af Adnan. Reuter

Palestínskur fangi í Ísrael batt í dag enda á 66 daga hungurverkfall í ljósi samkomulags sem felur í sér að honum verði sleppt í apríl. Þetta kom fram í máli Issa Qaraqaa, fangelsismálaráðherra Palestínu. Fanginn fór í hungurverkfall eftir að hafa verið handsamaður og haldið föngum án þess að kæra væri gefin út honum á hendur.

„Dómstóll í Ísrael hefur úrskurðað að Khader Adnan verði sleppt 17. apríl næstkomandi, fallist hann á að enda hungurverkfall sitt.“

Engin staðfesting hefur þó borist frá lögmanni Adnan, Jawad Bulus, eða frá yfirvöldum í Ísrael. Hæstiréttur Ísrael mun jafnframt taka áfrýjunarmál Adnans fyrir í dag.

Hann var handsamaður 17. desember síðastliðinn og neitaði degi síðar að neyta matar í mótmælaskyni við að vera haldið án kæru og meinta ótilhlýðilega framkomu þeirra sem sáu um yfirheyrslur yfir honum.

Mótmæli hans eru lengsta hungurverkfall sem palestínskur fangi hefur farið í og hafa jafnframt kallað fram viðbrögð frá alþjóðasamfélaginu. Gæsluvarðhaldsheimildir Ísraela, sem fela í sér að mögulegt er að halda grunuðum án þess að gefa út kæru, hafa sætt gagnrýni.

Stjórnvöld í Ísrael höfðu gefið út að Adnan væri „hryðjuverkamaður“ á vegum þekkts öfgahóps en höfðu ekki gefið út kæru á hendur honum eða sýnt opinberlega fram á sönnunargögn gegn honum.

Í janúar úrskurðaði herdómstóll Adnan í fjögurra mánaða gæsluvarðhald í óvenjulegum réttarhöldum sem fram fóru við spítalarúm hans á sjúkrahúsi í norðurhluta Ísrael.