Dharun Ravi í héraðsdómi í Middlesex í dag Reuters

Réttarhöld eru að hefjast yfir nítján ára gömlum pilti í New Jersey í Bandaríkjunum en hann er sakaður um að hafa myndað á laun samkynhneigðan herbergisfélaga sinn sem síðar framdi sjálfsvíg. Málið vakti hörð viðbrögð í Bandaríkjunum á sínum tíma og þær árásir sem samkynhneigð ungmenni í landinu þurfa oft að þola.

Dahrun Ravi á yfir höfði sér allt að tíu ára fangelsisvist verði hann fundinn sekur um alla ákæruliði. Meðal annars brot á friðhelgi einkalífs, þvingun og að hafa tafið fyrir rannsókn málsins.

Saksóknarar segja að Ravi sé hommahatari sem hafi notað myndavél í fartölvu sinni til þess að njósna um herbergisfélaga sinn, Tyler Clementi. Hann hafi meðal annars tekið upp á myndband þegar Clementi var að kyssa annan karlmann í herbergi þeirra á heimavist Rutgers-háskólans í New Jersey hinn 19. september árið 2010. Hann bauð síðan fleiri nemendum að koma og fylgjast í gegnum vefmyndavél með Clementi  tveimur dögum síðar. Eins sendi hann félögum skilaboð um hvað hefði komið fram á upptökunni og komst Clementi þannig að framferði herbergisfélagans. 

Clementi, sem var mjög efnilegur fiðluleikari, framdi síðan sjálfsvíg hinn 22. september með því að stökkva fram af George Washington-brúnni sem tengir New Jersey og New York.

Ravi segist vera saklaus og neitaði að semja um sekt gegn vægari refsingu. Hann heldur því fram að hann hafi ekki ætlað að særa neinn heldur hafi þetta einungis verið hrekkur af hans hálfu. Hann er ekki ákærður fyrir að bera ábyrgð á dauða Clementis.