Mótmæli fyrir utan herstöðina í Bagram í dag. Reuter

Yfirmaður bandaríska heraflans í Afganistan, John Allen, hefur beðist formlega afsökunar á því að íslömskum trúarritum, þar á meðal fjölda eintaka af Kóraninum, hafi verið eytt af hermönnum. Allen sagði ennfremur að málið yrði rannsakað frekar.

„Ég bið einlægur afsökunar á því að hafa misboðið forseta Afganistan, ríkisstjórn Afganistan og fyrst og fremst hinni göfugu alþýðu Afganistan,“ sagði Allen.

Hann vék þó ekki nánar að því með hvaða hætti trúarritunum var „eytt“ en ljósmyndari AFP fékk aðgang að eintökum Kóransins sem höfðu að hluta til verið brennd en að sögn verið bjargað af afgönskum starfsmönnum inni í bandarísku herstöðinni.

Mótmælendur vörpuðu bensínsprengjum og sátu um umfangsmestu bandarísku herstöðina í Afganistan í dag. Mikil reiði ríkti vegna fréttaflutnings af því að bandarískir hermenn hefðu brennt eintök af Kóraninum.

Mótmælendur kölluðu „Bandaríkjamenn deyi“, „Dauði yfir trúleysingjum“ á meðan verðir skutu gúmmíkúlum í varnarskyni að þeim. Ljósmyndari fréttastofu AFP kvaðst hafa verið hæfður í hálsinn.

Hundruð manna mótmæltu í höfuðborginni og öryggissveitir voru kallaðar á vettvang til að koma í veg fyrir algjört stjórnleysi.

Að sögn tilkynntu afganskir starfsmenn á herstöð Bandaríkjamanna fyrst um að Kóraninn hefði verið brenndur þar.