Mugabe segist hafa náð betri árangri en Kristur hvað dauða og upprisur varðar. Reuter

Forseti Simbabve, Robert Mugabe, fagnaði 88 ára afmæli sínu í dag. Hann nýtti jafnframt tækifærið til að hæðast að þeim sem hafa krafist þess að hann fari á eftirlaun og lýsti því yfir að hann væri „frískur eins og fiðla“.

„Sá dagur mun kom að ég veikist,“ sagði Mugabe í viðtali við ríkisútvarpið í Simbabve. „Sem stendur er ég hins vegar frískur eins og fiðla.“ Hann gerði jafnframt grín að fréttum um að hann væri þjakaður af lífshættulegum sjúkdómi.

„Ég hef margsinnis látið lífið. Ég hef slegið Kristi við á þessu sviði. Hann dó einu sinni og reis jafnframt í eitt skipti upp. Ég hef dáið og risið upp og ég veit ekki hversu oft ég mun endurtaka þann leik.“

Mugabe, sem hefur verið við völd frá árinu 1980, sagðist myndu bjóða sig aftur fram í kosningum, sem hann lagði áherslu á að halda ætti í ár.

„Rætur mínar liggja hjá fólkinu, í vitneskju þess. Flokksmeðlimir munu vafalaust velja einhvern þegar sá dagur kemur að ég segist ætla að hætta en það gerist ekki strax. Á þessum aldri get ég hlaupið aðeins lengra, ekki satt?“

Mugabe var jafnframt valinn forsetaframbjóðandi ZANU-PF-flokksins í desember síðastliðnum.

„Við verðum að halda kosningar. Þær verða að fara fram með eða án nýrrar stjórnarskrár. Ef aðrir vilja ekki halda kosningar er þeim frjálst að vera ekki með,“ sagði Mugabe í samtali við ríkissjónvarpið í Simbabve. „Það tekur enginn tilneyddur þátt í kosningum en ég mun, án nokkurs vafa, beita forsetavaldi mínu í samræmi við æðstu lög landsins, stjórnarskrána, og tilkynna hvenær kosningar munu fara fram.“