Strauss-Kahn flaug að sögn á milli höfuðborga og skemmti sér með vændiskonum. Reuter

Dominique Strauss-Kahn, fyrrverandi framkvæmdastjóri Alþjóðagjaldeyrissjóðsins, kom til yfirheyrslu hjá frönskum lögregluyfirvöldum í dag. Hann mun svara spurningum og gefa skýrslu í kjölfar ásakana um að hann hafi tekið þátt í kynlífsveislum í París og Washington sem tveir kaupsýslumenn borguðu reikninginn fyrir.

Strauss-Kahn, sem er 62 ára og þangað til á síðasta ári álitinn líklegur arftaki Nicolas Sarkozys Frakklandsforseta, átti upphaflega að gefa skýrslu sem vitni en saksóknarar segja nú að hann hafi stöðu grunaðs manns.

Hann kom á lögreglustöð í Lille rétt fyrir klukkan átta í morgun og er búist við að skýrslutakan um nýjasta kynlífshneykslið sem tengist Strauss-Kahn gæti staðið yfir í allt að 48 klukkustundir.

Þegar skýrslutöku lýkur er mögulegt að Strauss-Kahn, fallist dómari á þá kröfu, verði úrskurðaður í gæsluvarðhald.

Yfirvöld vilja vita hvort hann hafi vitað að konur sem skemmtu honum í veislum á veitingastöðum, hótelum og skemmtistöðum í Washington í Bandaríkjunum, París og fleiri höfuðborgum Evrópu hafi verið vændiskonur og greitt hafi verið fyrir þjónustu þeirra.

Einnig verður kannað, verði komist að þeirri niðurstöðu að hann hafi haft vitneskju um hvers eðlis þessar skemmtanir voru, hvort Strauss-Kahn hafi vitað að gestgjafar hans hafi greitt fyrir þjónustuna með illa fengnu fé, sem dregið var út úr fyrirtæki sem annar þeirra starfaði fyrir.

Það eitt að greiða vændiskonu fé er ekki ólöglegt í Frakklandi en að hagnast á glæpum og greiða fyrir vændi með illa fengnu fé getur leitt til ákæru.

Síðasta kynlífsveislan er sögð hafa farið fram á meðan Strauss-Kahn heimsótti Washington og höfuðstöðvar Alþjóðagjaldeyrissjóðsins 11.-13. maí í fyrra.