Borgarbúar í Christchurch á Nýja-Sjálandi vinna enn að uppbyggingarstarfi og reyna að gæða borgina lífi að nýju, ári eftir að mannskæður jarðskjálfti reið þar yfir og lagði allt í rúst.

Það var 22. febrúar 2011 sem skjálfti af stærðinni 6,3 reið yfir Christchurch með þeim afleiðingum að 184 létust. Borgin er smám saman að jafna sig á hamförunum, en afleiðingar þeirra sjást þó enn.

Flest háhýsi í viðskiptahverfi borgarinnar hrundu í skjálftanum eða voru rifin vegna skemmda í kjölfar hans. Nú, ári síðar, hafa litríkir skipagámar verið settir upp tímabundið í staðinn og hýsa þeir veitingahús og verslanir. Margir líta á þetta sem tækifæri til að byrja upp á nýtt með hreint borð.

„Margir hafa fyllst auknum krafti til uppbyggingar og staðreyndin er sú að við ætlum okkur að endurreisa viðskiptahverfið frá grunni, og byggja eitthvað miklu meira lifandi og áhugavert en það sem við höfðum áður. Svo þetta er borg tækifæranna, í margra huga,“ segir framkvæmdastjóri uppbyggingarstarfsins í borginni, Roger Sutton.

Í annarra augum verður tjónið hins vegar aldrei bætt, að sögn sálfræðingsins Fran Vertue. „Margir misstu ástvini, aðrir sluppu naumlega með lífshættulega áverka sem breyta lífi þeirra varanlega. Sumir misstu lífsviðurværi sitt og hjá mörgum hefur daglegt líf breyst til frambúðar. Verslanirnar sem þú sóttir kannski allt þitt líf eru hrundar til grunna. Allt hefur breyst, það tekur núna tvöfalt lengri tíma en áður að ferðast þvert yfir borgina. Svo allt landslag borgarinnar og lífsmunstur íbúanna hefur breyst í kjölfar jarðskjálftanna.“

Minningarathöfn verður haldin á morgun um þá sem létu lífið í skjálftanum.