Ekkert lát virðist ætla að vera á mótmælum í spænsku borginni Valencia en þúsundir tóku þátt í mótmælum þar í kvöld. Er niðurskurði í menntamálum og hörku sem lögregla hefur beitt gagnvart námsmönnum mótmælt.

Mótmælendur báru borða þar sem á stóð: Við erum þjóðin, ekki óvinir. Á öðrum stóð: Nóg og þeir skera niður í menntamálum til þess að stela meiru frá okkur.

Kröfðust mótmælendur að borgarstjórnin í Valencia segði af sér.  Myndir og myndskeið sem sýna lögreglu berja á námsmönnum sem mótmæltu niðurskurði í skólum borgarinnar á mánudag hafa farið eins og eldur í sinu um netheima á Spáni og vakið mikla reiði.

Námsmennirnir eru afar ósáttir við að sitja í ísköldum skólastofum og að engan klósettpappír sé að finna á salernum skóla.

Ekki bætti úr skák er lögreglustjórinn í Valencia, Antonio Moreno, lýsti mótmælendum sem óvinum á blaðamannafundi á mánudag í kjölfar átakanna.