Nefnd á vegum Evrópuráðsins, sem berst gegn pyntingum, hvetur Þjóðverja til að leggja af vönunaraðgerðir á kynferðisbrotamönnum. Nefndin segir að aðgerðin flokkist undir „niðurlægjandi meðferð“ og því beri að leggja hana af.

Þýskum kynferðisbrotamönnum, sem eru eldri en 25 ára, býðst að láta vana sig eða að fjarlægja eistun. Ekki er þó algengt að slíkar aðgerðir séu framkvæmdar, en undanfarinn áratug hafa þær verið færri en fimm. 

„Þrátt fyrir það verðum við að láta í ljós mótmæli okkar gegn því að slíkar aðgerðir séu skilgreindar sem meðferð fyrir kynferðisbrotamenn,“ segir í áliti nefndarinnar. „Með slíkum aðgerðum er verið að limlesta fólk á varanlegan hátt og þetta getur ekki með nokkru móti talist læknisfræðileg nauðsyn.“

104 kynferðisbrotamenn gengust undir slíkar aðgerðir á árunum 1970 til 1980. 3% þeirra hafa brotið af sér á nýjan leik. Af þeim kynferðisbrotamönnum, sem ekki gengust undir slíkar aðgerðir, hafa 46% brotið af sér aftur.

Þýskaland og Tékkland eru einu ESB-löndin þar sem slíkar aðgerðir eru framkvæmdar á kynferðisbrotamönnum.