Þeir sem vilja ljúka hjónabandinu geta gert það á mettíma á Jótlandi í Danmörku, en þar er gengið frá hjónaskilnuðum á örfáum mínútum. Metið er 12 mínútur. 

Að öllu jöfnu er biðtíminn eftir því að hjónaskilnaður gangi í gegn um fimm vikur frá því að sótt er um skilnað. En yfirvöld í bænum Aabenraa hafa gert ferlið fljótvirkara, nóg er að báðir aðilar mæti á bæjarskrifstofurnar og skrifi undir. Þá gengur skilnaðurinn í gegn á meðan beðið er.

Greinilegt er að mikil þörf er á hraðskilnuðum af þessu tagi en um fern hjón skilja á þennan hátt á hverjum degi. Stysti tíminn, sem skilnaður hefur tekið, er 12 mínútur.

Mette Haulund, sérfræðingur í skilnuðum og samböndum fólks, segir í samtali við vefsíðu danska dagblaðsins Berlingske Tiderne að þetta hafi jákvæð áhrif á þá sem í hlut eigi og auðveldi skilnaðinn til muna, þar með talið eignaskiptingu.

„Fólk getur nefnilega ekki haldið áfram, fyrr en skilnaðurinn er genginn í gegn. Á meðan beðið er eftir því er fólk í hálfgerðu tómarúmi og þá upphefjast oft harðvítug rifrildi. Með þessum hætti er hægt að komast hjá því,“ segir Haulund.