Frá kjarnorkuveri í Íran. AP

Eftirlitsmönnum Sameinuðu þjóðanna, sem hugðust kanna hvort Íranar væru að smíða kjarnavopn, var meinaður aðgangur að hernaðarlega mikilvægum stöðum í morgun. Íranar segjast auðga úran til orkuframleiðslu og til að meðhöndla krabbameinssjúka.

Reynt var að ná samkomulagi um að eftirlitsmennirnir fengju að fara ferða sinna á þá staði sem þeir töldu nauðsynlegt, en án árangurs. Þetta er í annað skipti á stuttum tíma sem eftirlitsmenn koma til Írans í þessum erindagjörðum og bar fyrri ferðin heldur ekki mikinn árangur.

Yukiya Amano, yfirmaður Alþjóðakjarnorkumálastofnunarinnar IAEA, talaði um mikil vonbrigði. „Við reyndum að ná samkomulagi, en það tókst ekki,“ sagði Amano við AFP-fréttastofuna. Hann sagði ekki hvort eða hvenær þess yrði freistað að fara aðra eftirlitsferð. IAEA sendi frá sér skýrslu í nóvember, þar sem líkum er leitt að því að Íranar smíði kjarnavopn og að þeir hafi prófað þau.

Bandaríkin og Evrópusambandið hafa sett viðskiptabann á olíu frá Íran vegna þessa. Vangaveltur hafa verið uppi um að Ísraelar hyggi á loftárásir á Íran, jafnvel í ár. Íranar hafa hótað því að loka Hormuz-sundi, en um það fara um það bil 20% af allri olíu sem framleidd er í heiminum.

Íranar neita því staðfastlega að hafa nokkuð með smíði kjarnavopna að gera og segja að þeir auðgi úran í þeim tilgangi að framleiða orku og meðhöndla krabbameinssjúklinga.

Ali Asghar Soltanieh, erindreki Írana hjá IAEA, sagði að viðræður hefðu verið árangursríkar og að þar hefði ríkt fullur skilningur á milli Írans og IAEA. „Þessar viðræður munu halda áfram,“ sagði hann.

Tilgangur ferðar eftirlitsmannanna var að reyna að varpa ljósi á þann orðróm sem verið hefur uppi um að Íranar séu að smíða kjarnavopn. Einnig átti að freista þess að taka aftur upp viðræður Írana við Bandaríkin, Kína, Rússland, Frakkland, Bretland og Þýskaland um kjarnavopnaeign, en upp úr þeim slitnaði fyrir rúmu ári.

Mark Hibbs, sem starfar hjá Carnegie-stofnuninni um alþjóðlegan frið sagði að heimsóknin væri síðasta tækifæri Írana til að sýna fram á samstarfsvilja.