Baltasar Garzón Reuters

Spænski rannsóknardómarinn Baltasar Garzón hefur lagt fram beiðni til hæstaréttar Spánar um að hann afnemi „geðþóttaákvörðun“ sína um að svipta hann lögmannsréttindum í ellefu ár fyrir að hafa heimilað ólöglegar upptökur af samtölum lögmanna.

Garzón segir að hæstiréttur hafi brotið alvarlega á rétti hans, líkt og annarra borgara, samkvæmt stjórnarskrá sem og réttindum hans sem sjálfstæði hans sem dómara.

Hann tekur einnig fram að hann telji dóminn rangan og ósanngjarnan. 

Ef hæstiréttur hafnar beiðni Garzón, líkt og væntanlega verður gert, mun hann áfrýja málinu til stjórnlangadómstóls Spánar.

Mannréttindafulltrúi Sameinuðu þjóðanna lýsti í kjölfar dóms yfir Garzón yfir áhyggjum sínum vegna sakfellingarinnar.

„Það á ekki að lögsækja dómara fyrir að sinna starfi sínu,“ sagði Rupert Colville, talsmaður Mannréttindafulltrúa Sameinuðu þjóðanna. Garzón var lögsóttur fyrir að fyrirskipa rannsókn árið 2008 á hvarfi rúmlega 100.000 einstaklinga á tíma spænsku borgarastyrjaldarinnar og jafnframt á Franco-tímanum frá 1939-1975.

Honum er gefið að sök að brjóta í bága við almenna sakaruppgjöf sem helstu stjórnmálaflokkar Spánar sættust á eftir dauða Francos.

„Spánverjar bera þá skyldu að alþjóðalögum að rannsaka alvarleg mannréttindabrot sem framin voru í fyrndinni og þar á meðal þau sem framin voru á tíma Franco-stjórnarinnar,“ sagði Colville.

Talsmaðurinn sagði jafnframt að samkvæmt alþjóðalögum væru Spánverjar „skyldugir“ til að afnema lög um almenna sakaruppgjöf frá 1977 í því augnamiði að rannsaka mannréttindabrot sem framin voru fyrr á tímum.