Hundruð þúsunda Þjóðverja verða að líkindum án raforku á næstunni vegna þess að þeir hafa ekki getað greitt rafmagnsreikningana sína. Þetta kemur fram á fréttavefnum Thelocal.de í dag og er þar vísað til niðurstaðna rannsóknar á vegum neytendasamtaka í þýska fylkinu Nordrhein-Westfalen í vesturhluta Þýskalands.

Samkvæmt niðurstöðunum hefur 300 þúsund manns í fylkinu verið hótað af orkufyrirtækjum að lokað verði fyrir rafmagn til þeirra vegna ógreiddra reikninga. Þá kemur einnig fram að lokað hafi verið fyrir rafmagn til 62 þúsund fjölskyldna í fylkinu árið 2010 vegna fjárhagsvandræða þeirra en nýjustu opinberar tölur eru frá því ári.

Ennfremur kemur fram að af þeim 58 orkufyrirtækjum sem rannsóknin náði til hafi þrjú af hverjum fjórum sagt að viðskiptavinir þeirra ættu í erfiðleikum með að greiða rafmagnsreikninga sína.

„Verðhækkanir upp á um 15% á rafmagni og gasi undanfarin tvö ár hafa þýtt að orka er að verða að gæðum sem mörg heimili hafa ekki efni á,“ er haft eftir Klaus Müller hjá neytendasamtökunum. Hann sagðist telja að um það bil 120 þúsund heimili í Nordrhein-Westfalen væru án orku vegna ógreiddra reikninga og um 600 þúsund á landsvísu í Þýskalandi.

Fram kemur í fréttinni að samkvæmt þýskum lögum þurfi orkufyrirtæki að fara í gegnum ákveðið lagalegt ferli áður en þau geta lokað fyrir orku til fólks og þar á meðal að senda því ítrekaðar viðvaranir. Þá eru ríkari kröfur gerðar þegar um er að ræða fólk sem á einhvern hátt á undir högg að sækja, til að mynda vegna fötlunar. Ekki er nóg að viðkomandi geti ekki eða vilji ekki greiða reikningana sína.