Nikitta Grender.

Maður í Wales hefur verið fundinn sekur um að hafa nauðgað og myrt unglingsstúlku sem var komin 38 vikur á leið. Maðurinn var frændi og náinn vinur kærasta stúlkunnar.

Carl Whant, sem er 27 ára, starfaði sem dyravörður á næturklúbbi og viðurkennir hann að hafa glímt við kókaínfíkn. Hann var einnig dæmdur fyrir íkveikju. Whant hlaut lífstíðardóm og þarf að afplána minnst 35 ár.

Skaðbrunnar líkamsleifar Nikittu Grender fundust í íbúð hennar og kærastans Ryan Mayes snemma að morgni 5. febrúar 2011. Krufning leiddi í ljós að hún hafði verið stungin í hálsinn og kviðinn. Ljóst þykir að Grender hafi verið látin áður en Whant kveikti í íbúðinni, í því skyni að reyna að eyða öllum sönnunargögnum. Hundur Grender lést í eldsvoðanum. Whant losaði sig við morðvopnið en lögreglan hafði hendur í hári hans eftir að sæði úr honum fannst í líki Grender. Þá fannst DNA úr Grender í bíl Whants.

Whant neitaði að hafa komið nálægt morðinu og sagði að þau hefðu stundað kynlíf daginn áður en hún fannst látin. Hinsvegar var það vel þekkt á meðal vina og ættingja Grender að henni var illa við Whant.

Myndbandsupptökur, sem sýna bíl Whants nálægt morðvettvanginum, voru lagðar fram sem sönnunargögn auka mynda af rispum og klóri á úlnliðum og olnbogum Whants, en þær voru teknar skömmu eftir morðið. Whant sagðist hinsvegar hafa verið á leið heim til ömmu sinnar að ná í sígarettur. Hún ætti heima nokkurn spöl frá heimili Grender en hann hafi hinsvegar ákveðið að keyra óhefðbundna leið til hennar í því skyni að reyna að forðast lögreglueftirlit þar sem hann hafði neytt eiturlyfja og áfengis áður en hann settist á bak við stýrið. Rispurnar væru eftir slagsmál á krá fyrr um kvöldið.

Þegar dómurinn hafði verið kveðinn upp sagði frændi Grender við fjölmiðla: „Síðustu 12 mánuðirnir hafa verið okkur erfiðari en við áttum nokkurn tímann von á. Við eigum enn erfitt með að trúa því sem gerðist.“