Dominique Strauss-Kahn Reuters

Fyrsta fyrirtakan í einkamálinu sem höfðað hefur verið í Bandaríkjunum gegn Dominique Strauss-Kahn hefur nú verið dagsett, og fer fram í Bronx í New York þann 15. mars. Réttarhöldin sjálf hefjast þó ekki strax heldur verður farið yfir rök beggja málsaðila.

Ljóst er því að Strauss-Kahn mun standa í ströngu í réttarsölum í næsta mánuði, því frönsk dómsmálayfirvöld hafa einnig tilkynnt að hann verði kallaður fyrir rannsóknardóm í lok mars vegna ásakana um að hann hafi stutt vændishring rekinn af skipulögðum glæpahópum og átt aðild að fjármálamisferli.

Strauss-Kahn hélt beinustu leið heim til Frakklands eftir að honum var sleppt úr haldi gæsluvarðhaldi í New York í fyrra, en þar tók ekki betra við því hvert hneykslismálið hefur rekið annað tengt vafasamri kynlífshegðan hans.

Eins og kunnugt er féll saksóknari í New York frá ákæru á hendur Strauss-Kahn vegna kynferðisofbeldis á síðasta ári, en konan sem sakar hann um árásina, Nafissatou Diallo, höfðaði í kjölfarið einkamál.

Diallo segir að Strauss-Kahn hafi reynt að nauðga henni á herbergi sínu á Sofitel hótelinu á Manhattan þar sem hún starfaði sem herbergisþerna. Hún krefst þess í einkamálinu að fá greiddar bætur frá Strauss-Kahn, en ekki hefur verið upplýst hversu háar bætur hún fer fram á.