Dominique Strauss-Kahn AP

Fyrrverandi framkvæmdastjóri Alþjóðagjaldeyrissjóðsins, Dominique Strauss-Kahn, verður látinn laus síðar í dag eftir að hafa verið yfirheyrður í tvo daga vegna kynlífsveislna sem hann tók þátt í.

Samkvæmt heimildum AFP fréttastofunnar verður Strauss-Kahn gert að mæta aftur fyrir rannsóknardómara síðar, annað hvort sem vitni eða hann verður ákærður fyrir tengsl við vændissölu og fjársvik.

Strauss-Kahn sagði í dag að hann hefði ekki grunað að konur sem hann hitti í svallveislunum væru vændiskonur þegar þær voru kynntar fyrir honum af yfirmönnum í lögreglunni.

Heimildir AFP herma að þetta hafi komið fram í máli Strauss-Kahn við yfirheyrslur í dag í Lille í Frakklandi. Hann er yfirheyrður vegna tengsla við vændishring og að hafa tekið þátt í misnotkun á peningum fyrirtækis. Hann var einnig yfirheyrður af innra eftirliti frönsku lögreglunnar, IGPN, sem rannsakar málefni aðstoðarlögreglustjóra Lille, Jean-Christophe Lagarde, sem hefur verið ákærður fyrir vændissölu.

Samkvæmt frönskum lögum varðar aðild að vændissölu allt að 20 ára fangelsi og verði hann dæmdur sekur um að hafa hagnast á fjárdrætti gæti hann átt yfir höfði sér allt að fimm ára fangelsi, auk sektar.

Lögreglan kvaðst vera að rannsaka hvort Strauss-Kahn hefði vitað að konur, sem skemmtu honum í veislum á veitingastöðum, hótelum og skemmtistöðum í Washington og París og fleiri evrópskum borgum, hefðu verið vændiskonur og greitt hefði verið fyrir þjónustu þeirra. Verði niðurstaðan sú að hann hafi vitað þetta verður rannsakað hvort Strauss-Kahn hafi haft vitneskju um að gestgjafar hans hafi greitt fyrir þjónustuna með fé sem dregið var út úr fyrirtæki sem annar kaupsýslumannanna starfaði fyrir.

Strauss-Kahn hefur neitað því að hann hafi tekið þátt í vændissölu eða fjárdrætti.

Tveir kaupsýslumenn, Fabrice Paszkowski og David Roquet, hafa verið ákærðir vegna málsins. Þeir eru taldir tengjast frönskum og belgískum konum sem stunduðu vændi á Carlton-hótelinu í Lille sem notið hefur mikilla vinsælda meðal kaupsýslumanna og stjórnmálamanna í borginni.

Alls hafa átta menn verið ákærðir í tengslum við „Carlton-málið“, þar á meðal þrír af stjórnendum hótelsins, þekktur lögfræðingur og, eins og áður sagði, aðstoðarlögreglustjóri borgarinnar.

Síðasta kynsvallið er sagt hafa farið fram þegar kaupsýslumennirnir hittu Strauss-Kahn í Washington 11.-13. maí í fyrra, m.a. til að ræða hugsanlegt forsetaframboð hans. Strauss-Kahn var þar til í fyrra álitinn líklegur arftaki Nicolas Sarkozys Frakklandsforseta.