Leonardo Zavattaro

Fjölmargir Argentínumenn leituðu örvæntingarfullir að ástvinum á spítölum Buenos Aires í dag í von um að þeir hefðu lifað af lestarslys í gærkvöldi sem kostaði 50 manns lífið. Hundruð eru slasaðir og hefur tveggja daga þjóðarsorg verið lýst yfir í landinu. Víða má sjá flaggað í hálfa stöng.

Rannsókn er hafin á tildrögum slyssins en farþegar segja að lestarstjórinn, Marcos Antonio Cordoba, hafi átt í erfiðleikum með bremsurnar skömmu áður en slysið átti sér stað. Lestin stöðvaðist seint og fór alveg framhjá einni stoppistöðinni. Svo fór að lestin náði ekki að hægja á sér á síðustu stöðinni og keyrði á fullum krafti á hlið með fyrrgreindum afleiðingum.

Cordoba hefur fimm ára starfsreynslu og þykir hafa staðið sig vel í starfi. Hann liggur á gjörgæsludeild og hefur enn ekki getað gefið lögreglumönnum skýrslu.

Björgunarmönnum hefur verið mikið hrósað fyrir að hafa notað vaselín og olíu til að ná fólki út úr löskuðum vögnunum en fremstu tveir vagnarnir krömdust saman. Marga klukkutíma tók að aðskilja yfir hundrað lifandi og látna sem höggið hafði kramið saman á nokkurra fermetra svæði.

Björgunarmenn sendu hina slösuðu á tólf spítala í Buenos Aires og í öllu uppnáminu voru þúsundir manna óvissir um hvort ættingjar þeirra og vinir hefðu lifað slysið af. Héldu þeir því á spítalana í övæntingarfullri leit. Gagnrýndu margir að nöfn ástvinanna fundust hvorki á lista yfir þá sem lifðu af eða á lista yfir hina látnu.

„Ég er viss um að dóttir mín sé 'Nafn: óþekkt' inni á einhverri slysadeildinni,“ sagði Viviana Acevedo við AP fréttastofuna.

Á Ramos Mejia spítalanum, skammt frá slysstaðnum, var Oscar Cesar Zapiola að leita að 14 ára frænku sinni. „Ég fór á ellefu spítala. Ég byrjaði hér og endaði hér,“ sagði Zapiola. „Ég hef engar upplýsingar. Ég vil ekki þurfa að fara í líkhúsið. Það er síðasti staðurinn sem ég vil fara á.“