Norski fjöldamorðinginn Anders Behring Breivik. Reuters

Norski fjöldamorðinginn Anders Behring Breivik setti ýmsar kröfur og skilyrði fyrir því að ræða við lögreglu fyrstu dagana eftir að hann var handtekinn eftir voðaverkin í Ósló og Útey. Meðal þess sem hann krafðist var að fá að prenta út stefnuyfirlýsingu sína, svokallað manifesto. Hann vildi ennfremur að teknar yrðu upp dauðarefsingar í Noregi.

Breivik fékk að prenta yfirlýsinguna út úr tölvu, en það er meira en 1500 blaðsíður og þar er meðal annars dagbók Breiviks og hugleiðingar um stjórnmálalega afstöðu hans.

Spurður að því hvers vegna Breivik hefði lagt svona mikla áherslu á að fá að prenta yfirlýsinguna út, svaraði verjandi hans, Geir Lippested, því til að hann vissi það ekki. „Hann lýsir því í stefnuyfirlýsingunni hvers vegna hann gerði það sem hann gerði,“ sagði Lippestad í samtali við vefsíðu norska dagblaðsins Aftenposten.

Blaðamaður Aftenposten spurði hann að því hvort það væri ekki óvenjulegt að grunaður maður fengi aðgang að gögnum sem tengdust málinu svo stuttu eftir glæpinn. „Ég veit ekki til þess að þetta hafi valdið neinum skaða,“ svaraði Lippestad.

Meðal annarra krafna Breiviks var að dauðarefsing yrði tekin upp í Noregi og að vatnspyntingum yrði beitt við yfirheyrslur.