Maður á götu í Tókýó, Japan. Reuters

Dauði fjölskyldunnar sem fannst eftir um tvo mánuði í íbúð í Japan hefur vakið umtal á áhyggjur Japana um s.k. „einmanalega dauða", sem eru nægilega algengir í landinu til þess að sérstakt hugtak sé til um fyrirbærið.

Þriggja manna fjölskyldan hafði legið dáin í a.m.k. 2 mánuði í íbúð sinni í borginni Saitama áður en hún uppgötvaðist. Búið var að loka á rafmagn- og gasleiðslur hússins vegna vangreiddra reikninga. Enginn matur var í húsinu, og aðeins nokkrir smáskildingar fundust í fórum fólksins, sem virtist vannært. Það var ekki fyrr en rekstrarfélag byggingarinnar fór að grennslast fyrir um málið sem í ljós kom að hjónin og sonur þeirra á fertugsaldri voru öll látin.

Of stolt til að leita hjálpar?

Í japönskum fjölmiðlum kemur fram að fjölskyldan hafi beðið nágranna sinn um hjálp vegna bágrar stöðu sinar, en verið hafnað og vísað á velferðaryfirvöld. Fjölskyldan gerði það hinsvegar aldrei og hefur sú kenning verið sett fram í fjölmiðlum að þeim hafi þótt það skammarlegt.

Þrátt fyrir að vera þriðja ríkasta land heims eru nokkur dæmi þess frá síðustu árum að japanskir borgarar deyi einir og yfirgefnir og finnist ekki fyrr en löngu síðar. Þetta kallast í japönsku „kodokushi", einmanalegur dauði. Síðast í janúar fundust tvær systur á fimmtugsaldri látnar í óupphitaðri íbúð sinni á eyjunni Hokkaido þar sem voru miklar vetrarhörkur.

Fréttaritarar BBC í Japan segja að málið hafi vakið japanskt samfélag, eitt það ríkasta í heimi, til sjálfsskoðunar um hvort hinir þurfandi týnist í velferðarkerfinu.