Frá útför óbreytts borgara sem lést í árásum Sýrlandshers. Reuters

Hræðilegar pyntingar eru stundaðar í fangelsum í Sýrlandi, einkum á þeim sem hafa verið handteknir vegna þátttöku í mótmælum gegn stjórn landsins. Börn og unglingar sæta pyntingum og ofbeldi og þúsundir hafa flúið til Jórdaníu.

Einn þeirra er 34 ára gamall maður sem kallar sig Abu Zeid, en honum tókst að flýja við illan leik til Jórdaníu. Hann segir að önnur hönd hans hafi verið limlest með lítilli sprengju eftir að hann neitaði að leggjast flatur fyrir framan mynd af Assad Sýrlandsforseta.

„Ég var pyntaður, barinn og mér var gefið raflost í kjallara í 15 daga eftir að ég tók þátt í mótmælum gegn ríkisstjórninni,“ segir Zeid sem nú dvelur á sjúkrahúsi sem er rekið af samtökunum Læknar án landamæra.

„Hersveitir Assads forseta handtóku skólabörn og hentu þeim inn í klefann til mín. Þau voru dauðskelkuð og grétu látlaust. Þá varð ég reiður og ég blótaði Assad og stjórn hans í hugsunarleysi. Verðirnir heyrðu til mín, sóttu mynd af Assad, börðu mig miskunnarlaust og sögðu mér að leggjast flatur fyrir framan myndina. Ég neitaði því og reif myndina í tvennt. Þá sprengdu þeir handlegginn, ég leið út af og vaknaði á sjúkrahúsi.“

Sameinuðu þjóðirnar segja að ríkisstjórn Sýrlands hafi mistekist algerlega að vernda sína eigin þegna. Þúsundir Sýrlendinga hafa flúið land, til Jórdaníu. Flestir skólar í landinu eru lokaðir vegna ástandsins í landinu og hefur mörgum þeirra verið breytt í fangelsi. Mannréttindasamtökin Human Rights Watch segja að börn allt niður í 13 ára sæti pyntingum sem skipulagðar séu af ríkisstjórn Assads. Sameinuðu þjóðirnar segja að a.m.k. 400 börn hafi látið lífið í átökunum í landinu og að minnsta kosti jafnmörg séu í haldi þar sem þau séu pyntuð og þeim misþyrmt á kynferðislegan hátt.

Said Heraki er sjötugur og með sykursýki. Hann var neyddur til að þamba mikið af vatni og þegar hann þurfti að kasta af sér vatni var hann afklæddur og gúmmíbandi vafið um eistu hans til að koma í veg fyrir þvaglát.  „Síðan var ég skilinn eftir aleinn, ég hélt að ég myndi springa, sársaukinn var óbærilegur og ég sagði að ég myndi gera hvað sem væri fyrir þá,“ sagði Heraki við fréttamann AFP-fréttastofunnar. Hann segist hafa verið látinn undirrita falsaða játningu um að hafa lagt eld að lögreglustöð og var síðan sleppt úr haldi fyrir skömmu. 

Hann missti tá, þegar fangaverðir settu brennheit kol á fót hans og helltu sjóðandi vatni yfir.