Gervihnattamynd sýnir elda loga í borginni Homs í Sýrlandi eftir að sprengjum var varpað á olíuleiðslu. Leiðslan liggur um hverfið Baba Amr. Reuters

Rauði krossinn hóf í dag brottflutning kvenna, barna og særðra frá borginni Homs í Sýrlandi, þar sem umsátursástand hefur ríkt í tvær vikur. Sjúkrabílum var ekið inn í Baba Amr úthverfið, þar sem tíðar sprengjuárásir hafa verið gerðar, eftir að samningar náðust um tímabundið vopnahlé á meðan.

Meðal þeirra sem biðu björgunar voru tveir alvarlega særðir blaðamenn sem sendu frá sér myndskeið með hjálparbeiðni fyrr í vikunni. Alþjóðaráð Rauða krossins hefur ekki gefið upp hvort þeir séu í hópi þeirra sem fluttir verða burt.

Tilkynnt var um brottflutninginn í kjölfar upphafs allsherjaffundar „Vina Sýrlands" í Túnis, þar sem m.a. var þrýst á um neyðaraðstoð. Fulltrúa 70 landa sátu fundinn og var niðurstaðan sú að krefjast þess að sýrlensk stjórnvöld láti samstundis af ofbeldinu í landinu, leyfi neyðaraðstoð og flutning neyðargagna inn á átakasvæðin.

Einni hétu fundarmenn því að skella frekari refsiaðgerðum á Sýrland verði ekkert að gert, þar á meðal ferðabann, frystingu eigna, frost á olíuviðskipti og slit diplómatískra samskipta. Þá verði komið í veg fyrir vopnaflutning til landsins.

Mótmælendur í Sýrlandi segja að yfir 7.000 manns hafi fallið á síðustu 11 mánuðum, þar af 90 í Homs í gær. Rauði krossinn ræddi bæði við fulltrúa yfirvalda og mótmælenda þar í dag um að fá tækifæri til að fara inn í úthverfin. Um 20 konur og börn hafa verið flutt burt auk 7 særðra manna.