Inaki Urdangarin AP

Tengdasonur Jóhanns Karls Spánarkonungs, Inaki Urdangarin, kom til borgarinnar Palma á eyjunni Mallorka dag þar sem hann mun koma fyrir dómara í fyrramálið en hann er sakaður um spillingu.

Urdangarin, sem ber titilinn hertoginn af Palma, er fyrrverandi landsliðsmaður í handbolta.  Hann er kvæntur Kristínu yngstu dóttur konungsins. Hann er grunaður um að hafa misfarið með fé opinberra sjóða sem hann var í forystu fyrir.

Rannsóknardómarinn Jose Castro Aragon rannsakar nú meint fjársvik Urdangarin í tengslum við góðgerðarsamtökin Instituto Noos sem hann var í forsvari fyrir.

Urdangarin og Kristín komu í kvöld á sumarleyfishöll konungsfjölskyldunnar þar sem þau munu gista í nótt. 

Þrátt fyrir að réttarhöldin hefjist ekki fyrr en í fyrramálið eru fréttamenn þegar byrjaðir að koma sér fyrir utan dómsalinn ... Reuters

Hann neitar að hafa brotið af sér en þann 12. desember sl. sagði Urdangarin af sér öllum opinberum skyldum vegna málsins en mikil reiði er meðal Spánverja vegna ásakana enda berjast milljónir Spánverja í bökkum vegna efnahagskreppunnar. Urdangarin þiggur engin laun frá spænska ríkinu.

Í gær sendi fjölskylda Urdangarins frá sér yfirlýsingu þar sem sakleysi hans er ítrekað og segir í yfirlýsingunni að um herferð gegn honum sé að ræða.