Námsmenn mótmæla í borginni Madríd á Spáni í dag. Reuters

Þúsundir námsmanna lokuðu vegum og fylltu stræti og torg borga og bæja á Spáni í dag, en þeir mótmæla niðurskurði hins opinbera og ofbeldi lögreglu gegn mótmælendum.

Samtök námsmanna boðuðu til mótmælaganga í um 40 borgum og bæjum og var m.a. verið að sýna námsmönnum í Valencia samstöðu, en þeir hafa komið einnig verst út úr niðurskurðinum og lenti þeim harkalega saman við lögreglu í síðustu viku.

„Við sköpuðum ekki þessa kreppu, en við greiðum fyrir hana á allan hugsanlegan hátt,“ sagði leiðtogi landssamtaka námsmanna, Tohil Delgado, í samtali við AFP-fréttastofuna. „Skorið er niður í menntun á vegum hins opinbera, en við eigum enga möguleika á að fá vinnu. Að auki er okkur misþyrmt ef við mótmælum á lýðræðislegan hátt.“

Námsmenn mótmæla í borginni Valencia á Spáni í dag. Reuters

Námsmennirnir hrópuðu: „Minni niðurskurð, meiri menntun“ er þeir gengu að menntamálaráðuneyti landsins í miðborg Madrídar.

Mótmælendur í Barcelona lokuðu hraðbraut og þar sváfu námsmenn í háskólum, eins og gert var víða um landið.

Ríkisstjórnin leggur áherslu á að víðtækra niðurskurðaraðgerða sé þörf til að koma efnahag Spánar á réttan kjöl.

Námsmenn mótmæla á götum borgarinnar Valensía á Spáni í dag. Reuters

Frá mótmælum spænskra námsmanna í borginni Madríd á Spáni í dag. Reuters