Mannskæð átök í Sýrlandi
Sýrlenskir skriðdrekar stjórnarhersins nálægt Homs. Reuters
Að minnsta kosti 105 Sýrlendingar voru drepnir í átökum víða í Sýrlandi í dag, degi áður en friðaráætlun Sameinuðu þjóðanna á að ganga í gildi.
Í hópi hinna föllnu eru 23 liðsmenn öryggissveita sem halda tryggð við Bashar al-Assad forseta og átta uppreisnarmenn. Allir hinir voru almennir borgarar, samkvæmt upplýsingum eftirlitsstofnunarinnar Syrian Observatory for Human Rights.
Minnst 35 almennir borgarar, þeirra á meðal konur og börn, voru drepnir í sprengjuárás á þorpið Latamna í Hama-héraði. Í þeim hópi voru fimmtán yngri en 18 ára og auk þess átta konur.
Herþyrla gerði árás á nágrannaþorpið Kfar Zeita þar sem stjórnarhermenn börðust við uppreisnarmenn á jörðu niðri.
Í Aleppo-héraði voru 27 almennir borgarar drepnir í sprengjuárás á bæinn Tal Rifaat en þar voru hörð átök milli stjórnarhermanna og uppreisnarmanna.
Uppreisnarmenn náðu á sitt vald varðstöð í þorpinu Salamah, í Aleppo-héraði, við landamæri Tyrklands, og drápu sex öryggis- og tollverði. Þá voru níu lögreglumenn drepnir í átökum nærri Sukari í borginni Aleppo.
Opinbera fréttastofan SANA sagði að 10 lögreglumenn og óbreyttir borgarar hefðu fallið og ellefu aðrir særst í átökunum þegar skotið var á öryggissveitir í mótmælaaðgerðum í Sukari.
Auk þeirra föllnu særðust margir í átökum dagsins.
