Erfingi konungs skaut sig í fótinn
Juan Carlos, Spánarkonungur. Reuters
Þrettán ára drengur, barnabarn Juan Carlos, Spánarkonungs, skaut sjálfan sig í fótinn í gærdag þegar hann æfði sig ásamt föður sínum að skjóta af haglabyssu.
Gert var að meiðslum drengsins, Felipe Marichalar Bornon, á Santa Barbara-spítalanum í Soria. Hann var í kjölfarið fluttur til Madrídar þar sem sár hans voru hreinsuð. Hann er elsta barnabarn konungsins, sonur Jaime de Marichalar, sem skildi við Elenu prinsessu árið 2009.
„Drengurinn skaut sjálfan sig með lítilli .36 kalíbera haglabyssu á verönd fyrir utan húsið og meiddist á hægri fæti“
Sofia drottning heimsótti barnið í morgun. Meiðsli þess eru ekki alvarleg.
Konungsfjölskyldan upplifði slíkt slys síðast í páskaviku hinn 29. mars árið 1956.
Juan Carlos konungur var viðstaddur þegar yngri bróðir hans, Alfonso, var skotinn til bana í slysi á aðsetri fjölskyldunnar í Estoril í Portúgal. Bræðurnir voru að sögn að leik með skammbyssu.
Heimildarmenn spænska dagblaðsins El País innan spænsku lögreglunnar segja að börnum undir fjórtán ára sé ekki heimilt að handleika skotvopn undir nokkrum kringumstæðum.
