Öryggisráðið þarf að grípa inn í

Kofi Annan reyndi að koma á vopnahléi í Sýrlandi. Martial Trezzini

Barack Obama, forseti Bandaríkjanna, og Angela Merkel, kanslari Þýskalands, ræddu saman í síma í dag um ástandið í Sýrlandi. Þau eru sammála um að öryggisráð Sameinuðu þjóðarinnar þurfi að grípa inn í ástandið með traustari hætti.

Átökin í Sýrlandi hafa staðið í 13 mánuði og kostað a.m.k. 9.000 manns lífið. Á miðnætti rann út frestur til að koma á vopnahléi sem byggt er á friðarsamkomulagi sem Kofi Annan lagði fram. Stjórnvöld í Sýrlandi samþykktu samkomulagið, en fátt bendir til að vopnahléi verði komið á.

Obama og Merkel eru sammála um að stjórnvöld í Sýrlandi hafi ekki staðið við skilmála friðarsamkomulagsins og að þau hafi haldið áfram árásum á óbreytta borgara í landinu. Því sé þörf fyrir frekari afskipti öryggisráðsins af málefnum Sýrlands.

Kofi Annan hefur í dag verið í Íran og átt viðræður við íranska ráðamenn um ástandið í Sýrlandi. Íran hefur stutt dyggilega við bakið á Assad forseta Sýrlands. Annan vonast eftir að Íranar geti haft áhrif á Assad og stjórn hans.