Berlusconi hélt „villtar veislur“

Vitni fyrir rétti í máli gegn Silvio Berlusconi á Ítalíu sagði í dag að Berlusconi, fyrrverandi forsætisráðherra Ítalíu, héldi „villtar veislur“ á setri sínu fyrir utan Mílanó, þar á meðal kjöltudanssýningar sem nefndust „Bunga Bunga“.

Imane Fadil, fyrirsæta, sagði að í fyrsta skipti sem hún fór í slíka veislu hefði Berlusconi fengið henni 2.000 evrur í hendur og sagt: „Ekki móðgast.“

Fadil sagði jafnframt að það kvöld hefði hún séð tvær ungar konur í nunnubúningum; í svörtum kyrtlum, með hvítar skuplur og með krossa um hálsinn, að dansa og fækka fötum fyrir framan forsætisráðherrann.

Önnur kvennanna var Nicole Minetti, sem situr fyrir hönd flokks Berlusconi í sveitarstjórn í Mílanó.

Fadil hélt því jafnframt að þær konur sem gistu í húsinu hefðu fengið meira fé greitt fyrir kynlíf og þær hefðu jafnframt gert allt sem í þeirra valdi stóð til að fá að gista. Hún sagðist hafa heyrt að Berlusconi hefði borgað fyrir kynmök með í það minnsta tveimur konum í veislum sínum.

Ítalskir fjölmiðlar greindu einnig frá því að Fadil hefði sagt að hún hefði sætt þrýstingi um að snúa aftur á setur Berlusconi þegar réttarhöldin voru þegar hafin.

„Maður stöðvaði fyrir utan húsið mitt og lét mig frá órekjanlegan síma til að skipuleggja heimsókn í húsið. En mig langaði ekki til þess,“ sagði hún í réttarsal í Mílanó.

Berlusconi er gefið að sök að hafa haft kynmök við vændiskonu undir lögaldri.