Ísbjörn skotinn í Suður-Grænlandi

Bæjarbúar í Narsaq hópuðust niður á bryggju til að skoða dýrið. Ljósmynd/Sermitsiaq.ag

Stærðarinnar ísbjörn var skotinn í bænum Narsaq í Suður-Grænlandi í dag. Talsverður mannfjöldi safnaðist saman á bryggju bæjarins til að virða dýrið fyrir sér og var skrokkur þess hengdur upp á krana. 

Það var veiðimaðurinn Richardt Efraimsen sem rakst á björninn þegar hann var á fiskveiðum úti fyrir höfðanum Nuugaarsuk. Ísbjörninn var á sundi í sjónum en Efraimsen beið þar til hann skreið upp á nærliggjandi ísjaka og drap hann með einu skoti. Þetta kemur fram á fréttavefnum Sermitsiaq.ag. Hann dró svo björninn að bryggju í Narsaq þar sem hann var hífður upp með krana og íbúar gátu virt hann fyrir sér. 

Má skjóta fjóra birni á ári

Fram kemur á Sermitsiaq að fréttin um ísbjörninn hafði kvisast út um bæinn og hafði því stór hluti bæjarbúa safnast saman á bryggjunni, þar á meðal flest skólabörnin í Narsaq. Síðar var einnig farið í vettvangsferð með leikskólabörn og íbúa dvalarheimilis aldraðra í bænum til að skoða dýrið. 

Um er að ræða birnu, á að giska fjögurra ára gamla. Þegar þeir sem það vildu höfðu skoðað skepnuna var birnan flegin. Það sem af er ári hafa þrír ísbirnir verið skotnir á þessum slóðum.. Kvótinn hljóðar hinsvegar upp á fjóra birni á ári og mega íbúar Suður-Grænlands því aðeins skjóta einn ísbjörn til. 

Myndir af ísbirninum má sjá hér.