Ekkert lát, þrátt fyrir vopnahlé
Sprengjur sprungu í borginni Idlib í norðvesturhluta Sýrlands í morgun og hafa að minnsta kosti 20 látið þar lífið, talið er að meirihluti þeirra séu meðlimir í öryggissveitum landsins. Fréttir hafa borist af því að fjórir lögreglumenn hafi verið skotnir til bana í höfuðborginni Damaskus í dag og gert var áhlaup á seðlabanka landsins í gær.
Yfirvöld segja aftur á móti að níu manns hafi látist og sagði ríkisfréttastofan SANA að hryðjuverkamenn stæðu að baki árásunum. Þar voru sendar út myndir af blóðidrifinni jörð og rætt við hóp fólks sem fordæmdi uppreisnarmenn og lýsti yfir stuðningi við Bashar al-Assad forseta landsins og stjórn hans. „Er þetta frelsið sem þau vilja,“ hrópaði maður og við hlið hans stóð kona með blæðandi barn í fangi.
Sendifulltrúar Sameinuðu þjóðanna komu til landsins í gær og var vopnahlé fyrirskipað þar 12. apríl. Samkvæmt fréttum SANA fóru eftirlitsmennirnir á átakastaði í morgun.
Norski hershöfðinginn Robert Mood, sem falið hefur verið að stýra starfsemi friðargæslu sameinuðu þjóðanna í landinu, ræddi við aðstoðarutanríkisráðherra Sýrlands í morgun og hann hvatti alla stríðandi aðila til að standa við vopnahléið. Hann sagði að ærið verkefni væri fyrir höndum.
